२ असोज, धनगढी । कैलालीमा अविरल वर्षापछि आएको बाढीका कारण प्रभावित भएकाहरु अवस्था समान्य बन्दै गएपछि घर फर्किन थालेका छन् । पूर्वी कैलालीमा विभिन्न नदीको बाढी बस्तीमा पस्दा घर डुबानमा परेपछि विस्थापित भएकाहरु बाढी रोकिएपछि पुनः घर फर्किन थालेका हुन् ।
‘बाढी घटेर अवस्था समान्य भएका स्थानहरुमा मानिसहरु घर फर्किन थालिसकेका छन,’ जिल्ला प्रशासन कार्यालयका सूचना अधिकारी शिवराज जोशीले भने, ‘कतिपय ठाउँमा अहिले पनि पानी जमेकाले सार्वजनिक भवन, विद्यालय र आफन्तकोमा बसिरहेका छन् । विस्तारै अवस्था समान्य बन्दै गएको छ ।’
शुक्रबारदेखि परेको अविरल वर्षापछि आएको बाढीले कैलालीमा करीब १५ सय घर डुबानमा परेपछि झण्डै ६ हजार मानिस प्रभावित भएको अनुमान गरिएको छ ।
जिल्लामा बाढीले बगाएर एक जनाको मृत्यु र घर भत्किदा दुई जना घाइते बाहेक थप मानवीय क्षति नभएको प्रहरी प्रशासनले जनाएको छ ।
