लागू औषध सहित गोदावरीबाट युवक पक्राउ, धनगढीबाट भारतीय नागरिक समातिए
अत्तरिया । कैलालीको गोदावरीबाट लागू औषध सहित युवक पक्राउ परेका छन् ।
जिल्ला प्रहरी कार्यालय कैलालीबाट खटिएको प्रहरी टोलीले गोदावरी नगरपालिका – ८ बाट स्थानीय २६ वर्षीय सुरेन्द्र चौधरीलाई पक्राउ गरेको हो ।
बुधवार पक्राउ परेका उनको साथबाट ४७० मिलिग्राम लागू औषध खैरो हेरोइन जस्तो देखिने धुलो पदार्थ बरामद गरिएको जिल्ला प्रहरी कार्यालय कैलालीले जनाएको छ ।यस्तै बुधवार नै सुदूरपश्चिम प्रदेश प्रहरी कार्यालय, धनगढी र अस्थायी प्रहरी पोस्ट जुगेडाबाट खटिएको प्रहरी टोलीले धनगढी उपमहानगरपालिका – १२ शिमलघाट नजिकबाट लागू औषध सहित भारतीय नागरिकलाई पक्राउ गरेको छ । पक्राउ पर्नेमा भारत लखिमपुर खीरी, सुडाका ४५ वर्षीय छोटेलाल राना रहेको प्रदेश प्रहरी कार्यालय धनगढीले जनाएको छ ।
उनको साथबाट ३ ग्राम ३७० मिलिग्राम लागू औषध खैरो हेरोइन जस्तो देखिने धुलो पदार्थ बरामद गरिएको प्रहरीको भनाइ छ ।
