धनगढी । अछामा खेत बारीमा लुकाइएको भरुवा बन्दुकसहित प्रहरीले एक जनालाई पक्राउ गरेको छ । पक्राउ पर्नेमा पञ्चदेवल बिनायक नगरपालिका–९ ओखरगैरा बस्ने ६८ वर्षीय नन्दराम साउँद रहेका छन् ।
साउँदलाई इलाका प्रहरी कार्यालय कालेकाँडाबाट खटिएको प्रहरी टोलीले गोप्य सूचनाको आधारमा घर तथा बारीमा खाँनतलासी गर्दै बन्दुकसहित फक्राउ गरिएको हो ।
उनले घर नजिकैको बारीमा लुकाई छिपाई राखेको अवस्थामा एक नाले भरुवा बन्दुक र १३ वटा सिसाको गोली बरामद गरिएको छ । सोही ठाउँ बस्ने ६७ वर्षीय चिन कार्कीलाई पनि भरुवा बन्दुकसहित पक्राउ गरिएको छ । कार्की आफ्नै घरको सुत्ने कोठामा लुकाई छिपाई राखेको अवस्थामा एक नाले भरुवा बन्दुकसहित पक्राउ परेका हुन् ।
उनको घरबाट ९ वटा सिसाको गोली र बारुद पनि बरामद गरिएको छ । उनीहरु दुवै जनालाई नियन्त्रणमा राखेर अनुसन्धान भइरहेको प्रहरीले जनाएको छ ।
