काठमाडौं । गोंगबुको मिरमिरे दोहोरी साँझमा पुगेका समूहको आक्रमणबाट एकजनाको ज्यान गएको छ । दोहोरी साँझमा झडप गरेका दुई समूहमध्ये एक समूहले बाटोमा हिँड्दै गरेका पैदल यात्रुको हत्या गरेका हुन् ।
गोरखाको सिरानचोक गाउँपालिका–७ घर भई टोखा नगरपालिका–९ गोंगबु बस्ने २० वर्षीय बबिन गुरुङको मृत्यु भएको हो । दोहोरी साँझमा झगडा गरेर बाहिर निस्केका मध्ये हरिशरण पन्तले पैदल हिड्दै गरेका बविनमाथि धारिलो हातियार प्रहार गरेको खुलेको छ ।
पन्तलाई काठमाडौं प्रहरीले बुधबार बिहानै पक्राउ गरेको छ । पन्त धादिङको नेत्रावती डबजोङका हुन् । उनीसँगै प्रहरीले सोही ठाउँका श्रीकृष्ण पन्तलाई समेत पक्राउ गरेको छ ।
प्रहरीको अनुसन्धानका क्रममा दोहोरी साँझमा उनीहरू र डडेलधुराका वीरेन्द्र साउद, दार्चुलाका जनक सिंह नगारी समूहबीच झडप भएको थियो ।
प्रहरीले दोहोरी साँझका सञ्चालकसहित झडप गर्ने ६ जनालाई पक्राउ गरेर अनुसन्धान गरिरहेको जनाएको छ ।
