काठमाडौं । पूर्वप्रधानमन्त्री एवम् एकीकृत समाजवादीका अध्यक्ष माधव कुमार नेपालले तारागाउँ विकास समिति सरकारलाई बोझ बनेको बताएका छन् ।
तारागाउँको नाममा विभिन्न जिल्लामा जग्गा र होटल÷रेष्टुरेण्टहरु रहेको भन्दै उनले तिनको राम्रोसँग सदुपयोग नभएको बताएका हुन् ।आज बसेको अन्तर्राष्ट्रिय सम्बन्ध समिति तथा पर्यटन समितिको बैठकमा नेपालले सो धारणा राखेका हुन् ।तारागाउँ विकास समितिबाट सन्चालित ककनीको रिसोर्टमा आफू पनि बसेको जानकारी दिँदै उनले भने, ‘व्यवस्थापन अत्यन्तै खतम छ ।’
२०६१÷६२ तिर नगरकोटको नेपाली सेनाको ब्यारेक नजिकको रिसोर्टमा पनि आफू बसेको भन्दै उनले त्यसको बेहाल देखेको बताए । उनले पोखराको रिसोर्टबारे पनि नराम्रो कुरा सुनेको नेपालले बताए ।तारागाउँ विकास समिति केही कर्मचारी र व्यक्तिहरुलाई जागिर खुवाउने ठाउँमात्रै बनेको छ कि यसबाट सरकारलाई राजश्व पनि प्राप्त भइरहेको छ भनेर जानकारी राख्नुपर्ने उनले बताए ।
तारा गाउँ विकास समितिको नाममा रहेका जग्गा र रिसोर्टहरु सदुपयोग भइरहेको छ कि दुरुपयोग भइरहेको छ भनेर जानकारी लिनुपर्ने र दीर्घकालसम्म सोचेर व्यवस्थित बनाउनुपर्ने उनले बताए । राम्रोसँग सन्चालन गर्न निजी क्षेत्रलाई पनि दिन सकिने नेता नेपालको भनाइ छ ।
‘जग्गा छ, भवन छ । व्यवस्थापन कस्तो छ ? कति जग्गा व्यापारिक परियोजनमा प्रयोग गर्ने गरिएको छ ? कति त्यसको निम्ति मिहिनेत गरिएको छ ?’ नेपालले भने, ‘यस्ता कुराहरुको अलि लामो समयको कुरा सोचेर व्यवस्थापनका लागि प्राइभेटलाई दिने हो भने प्राइभेटलाई दिनुपर्यो । यो बोझको रुपमा रहनु भएन ।’
