राष्ट्रिय प्रजातन्त्र पार्टी (राष्ट्रिय प्रजातन्त्र पार्टी) का अध्यक्ष राजेन्द्र लिङ्देन ले राजसंस्थाबारे आफ्नो पार्टीको धारणा स्पष्ट पारेका छन्। उनले राजा कुनै पनि राजनीतिक दलसँग आबद्ध नहुने भएकाले राप्रपा “राजाको पार्टी” नभई राजसंस्थामा विश्वास गर्नेहरूको पार्टी भएको बताएका छन्।
तनहुँमा आयोजित गण्डकी प्रदेशस्तरीय निर्वाचन समीक्षा कार्यक्रममा बोल्दै उनले राप्रपा सम्वर्द्धनवादी दर्शन बोकेको पार्टी भएको दाबी गरे। उनका अनुसार राजसंस्था कुनै दल, संगठन वा विचारभन्दा माथि रहने संस्था हो, त्यसैले राप्रपालाई राजाको दल भनेर प्रचार गर्नु गलत र भ्रमपूर्ण रहेको उनले बताए।
गणतन्त्र प्रणालीभित्र सरकारमा सहभागी हुनु नहुने भन्ने तर्कप्रति पनि उनले प्रतिक्रिया दिए। सरकारमा नजाँदैमा पार्टी बलियो हुने भए अन्य साना दलहरू अझ शक्तिशाली हुनुपर्ने उनको तर्क थियो। पार्टीभित्रको विवादबारे बोल्दै उनले चुनावअघि सबैलाई समेट्ने प्रयास गर्दा अनुशासन उल्लंघन भएको भन्दै अब आवश्यक कारबाही अघि बढाइएको जानकारी दिए।
राप्रपाले हालै सम्पन्न निर्वाचनपछि सातै प्रदेशमा समीक्षा कार्यक्रम सञ्चालन गरिरहेको छ। मधेश, कोशी र गण्डकी प्रदेशमा समीक्षा सम्पन्न भइसकेको छ भने लुम्बिनी, बागमती र सुदूरपश्चिम प्रदेशमा क्रमशः वैशाख १४, १५ र १७ गते बैठक तय गरिएको छ। कर्णाली प्रदेशको मिति भने अझै निर्धारण हुन बाँकी छ।
