धनगढी । गोपाल हमाल ले मेयर बनेपछि पाएको तलब, भत्ता र अन्य सेवा सुविधाको रकम सामाजिक काममा खर्च गरेका छन् ।
मेयर निर्वाचित भएपछि उनले सेवा सुविधा नलिने घोषणा गरेका थिए । तर कानुन अनुसार रकम उनको खातामा जम्मा हुँदै आएको थियो । त्यसपछि उनले आफूले पाएको रकममा थप पाँच लाख १७ हजार रुपैयाँ आफ्नै तर्फबाट थपेर कुल ४४ लाख रुपैयाँ सामाजिक सेवामा खर्च गर्ने निर्णय गरेका हुन् ।
चार वर्षमा मेयर हमालले सेवा सुविधा वापत ३८ लाख ८२ हजार ८३२ रुपैयाँ पाएका छन् । त्यसमा व्यक्तिगत रकम थपेर कुल ४४ लाख पुगेको उनको सचिवालयले जनाएको छ ।
अहिलेसम्म उनले सार्वजनिक शिक्षा, विपन्न विद्यार्थीको पढाइ, गौ संरक्षण र सामाजिक विकासका काममा २३ लाख ९० हजार ८७८ रुपैयाँ खर्च गरिसकेका छन् । बाँकी रकम पनि सामाजिक काममै खर्च गर्ने उनले बताएका छन् ।
मेयर बनेको पहिलो वर्ष उनले पाएको १ लाख ३७ हजार रुपैयाँमध्ये केही रकम गौ संरक्षण सेवा समिति र दक्षिणकाली आधारभूत बहिरा आवासीय विद्यालयलाई सहयोग गरेका थिए ।
आर्थिक वर्ष २०७९/८० मा दृष्टि फाउन्डेसन, मानव सेवा आश्रम, आमाको माया छात्राबास, खगेन्द्र नवजीवन केन्द्र र दक्षिणकाली विद्यालयका २६९ जनालाई न्यानो लुगा वितरण गरिएको थियो ।
त्यसैगरी, आर्थिक वर्ष २०८०/८१ मा धनगढीका १७ सामुदायिक विद्यालयका ३ हजार ४ सय ८९ विद्यार्थीलाई झन्डै १० लाख रुपैयाँ बराबरको शैक्षिक सामग्री वितरण गरिएको थियो ।
आर्थिक वर्ष २०८१/८२ मा ४७ सामुदायिक विद्यालयका ७ हजार ४७५ विद्यार्थीलाई शैक्षिक सामग्री वितरण गर्न १० लाख रुपैयाँ खर्च गरिएको सचिवालयले जनाएको छ ।
चालु आर्थिक वर्षको अन्त्यसम्म थप ९ लाख ३६ हजार रुपैयाँ सेवा सुविधा वापत प्राप्त हुने र त्यो रकम पनि सामाजिक काममै खर्च गर्ने तयारी रहेको बताइएको छ ।
मेयर हमालले शुक्रबार पत्रकार सम्मेलन गरेर आफूले पाएको सेवा सुविधा र त्यसको खर्च विवरण सार्वजनिक गरेका हुन् ।
