काठमाडौं । राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानेन्द्र शाहीले नागढुंगा सुरुङमार्गबाट पूर्वप्रधानमन्त्री केपी शर्मा ओलीको अभिलेख हटाइएको विषयमा कटाक्ष गरेका छन् । हिजो राजाका पालामा बनेका भौतिक संरचना, सार्वजनिक संस्थान तथा राजमार्गहरूको नाम परिवर्तन गर्नेहरूले आज आफ्नै इतिहास मेटिँदा दुःख मान्नु नपर्ने उनको टिप्पणी छ ।
शाहीले भने, ‘नागढुंगा सुरुङमार्गबाट पूर्वप्रधानमन्त्री केपी शर्मा ओलीको नाम हटाइयो भनेर अहिले निकै चर्चा भइरहेको छ । तर, यसमा दुःख मान्नुपर्ने कुनै कारण छैन । हिजो तिमीहरूले राजाको इतिहास मेटायौ, आज अरूले तिमीहरूको इतिहास मेटाइदिए ।’
राजाका पालामा निर्माण भएका संरचना र त्यससँग जोडिएका ऐतिहासिक पहिचान योजनाबद्ध रूपमा मेटाउने प्रयास गरिएको उल्लेख गर्दै शाहीले त्यही प्रवृत्ति आज अर्कै रूपमा दोहोरिएको बताएका छन् । उनले भने, ‘हिजो हुँदाहुँदा राजमार्गहरूको नामसमेत फेरियो । राजाका पालामा बनेका संरचना र त्यससँग जोडिएको इतिहास योजनाबद्ध रूपमा मेटाउने प्रयास तिमीहरूले नै गर्यौ ।’
यो घटनाले आफूलाई एउटा पुरानो कथा सम्झाएको उल्लेख गर्दै शाही थप्छन्, ‘एकजना छोराले आफ्नी वृद्ध आमालाई डोकोमा बोकेर भीरबाट फाल्न लगेछ । आमालाई फालेर फर्किएपछि उसको सानो छोराले भन्यो, ‘बुबा, त्यो डोकोचाहिँ नफाल्नुहोस् है, राखिराख्नुहोस् । भोलि तपाईं बूढो भएपछि तपाईंलाई फाल्न पनि यही डोको काम लाग्छ । आज ठ्याक्कै त्यस्तै भएको छ । इतिहास मेटाउनेहरूले सधैँ सम्झनुपर्छ- आज अरूको इतिहास मेटाउने पालो तपाईंको होला, तर भोलि तपाईंको इतिहास मेटाउने अर्को कोही तयार भएर बसेको हुन सक्छ ।’
