धनगढी । कैलालीको घोडाघोडी नगरपालिका–७ हरिनगरमा किराना पसलको गोदाममा लुकाएर राखिएको पटाकासहित पसल सञ्चालक पक्राउ परेका छन् ।
जिल्ला प्रहरी कार्यालय कैलालीका अनुसार पक्राउ पर्नेमा हरिनगर बस्ने ३५ वर्षीय गगन बिष्ट रहेका छन् ।
अस्थायी प्रहरी पोष्ट हरिनगरबाट खटिएको प्रहरी टोलीले बुधबार बिष्टले सञ्चालन गरेको न्यू दुर्गा किराना पसलमा शंकाका आधारमा चेकजाँच गरेको थियो । सो क्रममा पसलको गोदाममा लुकाइछिपाइ राखिएको अवस्थामा ४८ प्याकेट भएको एक कार्टुन पटाका फेला परेको प्रहरीले जनाएको छ ।
प्रहरीले पटाका बरामद गरी पसल सञ्चालक बिष्टलाई समेत पक्राउ गरेको हो ।
पक्राउ परेका बिष्टलाई कैलाली जिल्ला अदालतबाट म्याद थप गरी थप अनुसन्धान भइरहेको जिल्ला प्रहरी कार्यालय कैलालीले जनाएको छ ।
