

धनगढी । महोत्तरीको गौशाला नगरपालिका–१ सानो कुशमाडीस्थित उखुबारीमा ६५ वर्षीया महिलाको शव फेला परेको छ ।
स्थानीय विणामाया पुलामीको शव शुक्रबार बिहान उखुबारीमा फेला परेको इलाका प्रहरी कार्यालय गौशालाका प्रहरी निरीक्षक मधुसुदन विश्वकर्माले जानकारी दिए ।
उनका अनुसार विणामाया बिहीबार घाँस काट्न घरबाट निस्किएकी थिइन् । तर, उनी शुक्रबार बिहान मृत अवस्थामा फेला परेकी हुन् ।
शवको प्रकृति हेर्दा हत्या भएको हुनसक्ने प्रहरीको प्रारम्भिक अनुमान छ । उनको घाँटीमा गम्छा कसिएको जस्तो देखिएको प्रहरी निरीक्षक विश्वकर्माले बताए ।
घटनाको सूक्ष्म अनुसन्धान भइरहेको र अनुसन्धानका लागि तालिम प्राप्त कुकुरसमेत परिचालन गरिएको प्रहरीले जनाएको छ ।

