धनगढी । बैतडीमा चुनाव प्रचारप्रसारका क्रममा राष्ट्रिय स्वतन्त्र पार्टी (रास्वपा) र नेपाल कम्युनिस्ट पार्टी (एमाले) का कार्यकर्ताबीच झडप हुँदा दुई जना घाइते भएका छन्।
जिल्लाको डिलासैनी गाउँपालिका–७ लेक टोलमा घरदैलो कार्यक्रमका क्रममा दुवै पक्षबीच विवाद चर्किएपछि झडप भएको जिल्ला प्रहरी कार्यालय बैतडी ले जनाएको छ।
प्रहरीका अनुसार घाइते हुनेमा डिलासैनी–७ का २८ वर्षीय जनक धामी र २६ वर्षीय माधव धामी रहेका छन्। दुवै जना एमाले निकट युवा संघसँग आबद्ध रहेको बताइएको छ।
झडपमा जनकको टाउको र निधारमा चोट लागेको छ भने माधवको ढाड र दाहिने खुट्टामा चोट लागेको प्रहरीले जनाएको छ। उनीहरूको उपचार गोकुलेश्वर अस्पतालमा भइरहेको छ।
घटनाबारे थप अनुसन्धानका लागि प्रहरी निरीक्षकको नेतृत्वमा टोली खटिएको र अवस्था नियन्त्रणमा रहेको प्रहरीले जनाएको छ।
प्रहरीले दाेहाेराे झडप भनेपनि एमालेले भने घरदैलो सम्पन्न गरेर फर्किने क्रममा आफ्ना कार्यकर्तामाथि ज्यान मार्ने उद्देश्यले हतियार प्रयाेग गरेर आक्रमण गरेकाे दाबी गरेकाे छ । उनीहरू दुवै जना एक्लै भएको माैका छाेपेर आक्रमण गरिएको एमालेकाे आराेप छ ।
