धनगढी — नेपाल वितरक महासंघको १४ औँ वार्षिक साधारण सभा आजदेखि सुदूरपश्चिम प्रदेशको आर्थिक केन्द्र धनगढीमा सुरु हुँदैछ। महासंघले पहिलो पटक आफ्नो साधारणसभा सुदूरपश्चिममा आयोजना गर्न लागेको हो।
स्वदेशमा उत्पादित तथा विदेशबाट आयातित दैनिक उपभोग्य वस्तुहरूको बिक्री–वितरण गर्दै आएका देशभरका वितरकहरूको छाता संगठन महासंघले सुदूरपश्चिमको पर्यटन प्रवर्द्धन गर्ने उद्देश्यले यहाँ कार्यक्रम आयोजना गरेको जनाएको छ।
वैशाख ११ र १२ गते दुई दिनसम्म सञ्चालन हुने साधारणसभाको उद्घाटन सुदूरपश्चिम प्रदेश प्रमुख नजिर मियाँले गर्ने कार्यक्रम रहेको महासंघका अध्यक्ष दुर्गा गौतमले जानकारी दिए।
साधारणसभामा देशभरबाट ३०० भन्दा बढी प्रतिनिधिको सहभागिता रहनेछ भने सम्पूर्ण तयारी पूरा भइसकेको जनाइएको छ। कार्यक्रममा पेट्रोलियम पदार्थको मूल्यवृद्धिका कारण वितरक व्यवसायीहरूले भोगिरहेका समस्या लगायतका विषयमा छलफल गरिनेछ।
पत्रकार सम्मेलनमा अध्यक्ष गौतमले इन्धनको मूल्य अत्यधिक बढ्दा पनि सामान ढुवानी गर्नुपर्ने बाध्यता रहेको बताए। “पेट्रोलियम पदार्थको मूल्य वृद्धि भए पनि हामीले ढुवानी रोक्न सक्दैनौँ,” उनले भने, “सबैभन्दा बढी समस्या वितरक व्यवसायीले नै भोगिरहेका छन्।” उनले इन्धन महँगिए पनि हालसम्म ढुवानी भाडा नबढाइएको स्पष्ट पारे।
