काठमाडौँ । राष्ट्रिय स्वतन्त्र पार्टी (रास्वपा)की सांसद सृष्टि भट्टराईले कारको झ्यालबाट शरीर निकालेर यात्रा गरेको भिडियो भाइरल भएको छ।
सामाजिक सञ्जाल (फेसबुक)मा पोस्ट भएको भिडियोमा भट्टराईले कारको अगाडि सिटमा बसेर लापरबाहीपूर्वक यात्रा गरेको देखिन्छ।
भट्टराई रास्वपाको समानुपातिक तर्फकी सांसद हुन्। लापरबाहीपूर्वक यात्रा गर्दा दुर्घटनाको जोखिम हुने भन्दै ट्राफिक प्रहरीले सचेतना कार्यक्रम सञ्चालन गर्दै आएको छ । लापरबाहीपूर्वक सवारी चलाउने यात्रुलाई सवारी तथा यातायात व्यवस्था ऐन २०४९ अनुसार जरिवाना हुने कानुनी व्यवस्था छ।
सामाजिक सञ्जाल प्रयोगकर्ताले भट्टराईमाथि कारबाही गर्न माग गरेका छन्। यसअघि राजमार्ग सुरक्षा तथा ट्राफिक व्यवस्थापन कार्यालय इटहरीले सांसद हर्क साम्पाङलाई जरिवाना गर्ने निर्णय गरेको थियो । सामाजिक सञ्जाल प्रयोगकर्ताले भट्टराईलाई पनि कारबाही गर्न माग गरेका हुन्।
भट्टराईलाई के कारबाही गर्ने भन्नेबारे आन्तरिक छलफल भइरहेको काठमाडौँ उपत्यका ट्राफिक प्रहरी कार्यालयका एक जना अधिकृत बताए । सो भिडियो कुन ठाउँको हो भन्नेबारे सुरक्षा अधिकारीहरूले यकिन गर्ने प्रयास गरिरहेका छन् । भिडियो कुन समयको हो भन्नेबारे पनि खुलेको छैन।
