धनगढी । कैलालीको इलाका प्रहरी कार्यालय सुखडका प्रमुख प्रहरी नायब उपरीक्षक (डीएसपी) प्रसन्नराज चौधरीलाई सार्वजनिक कार्यक्रममा दिएको अभिव्यक्तिबारे स्पष्टिकरण लिन जिल्ला प्रहरी कार्यालय बोलाइएको छ।
घोडाघोडी नगरपालिका–५ दरखमा आयोजित लागूऔषध सचेतना कार्यक्रममा उनले ‘हामी बालेनको पुलिस होइन, नेपाल पुलिस हो’ भन्दै दिएको अभिव्यक्ति सामाजिक सञ्जालमा भाइरल भएपछि जिल्ला प्रहरीले उनीसँग सोधपुछ गर्न बोलाएको हो।
कैलालीका प्रमुख प्रहरी उपरीक्षक (एसपी) नरेन्द्र चन्दले डीएसपी चौधरीलाई घटनाबारे सामान्य बुझ्नका लागि जिल्ला बोलाइएको पुष्टि गरे।
जिल्ला प्रहरी कार्यालयले प्रधानमन्त्रीबारेको अभिव्यक्ति मात्र नभएर डीएसपी चौधरीविरुद्ध अन्य गुनासो समेत आएकाले ती विषयमा पनि सोधपुछका लागि बोलाइएको जनाएको छ । चौधरीलाई सोधपुछसँगै पेशागत आचारणअनुसार काम गर्न सम्झाइबुझाइ गर्नेगरि बोलाइएको एसपी चन्द बताउँछन् ।
कार्यक्रममा चौधरीले ‘अन्यायमा परेकालाई न्याय दिलाउने पुलिस यही हो, केपी ओलीलाई थुन्ने पुलिस पनि यही हो’ भन्दै प्रहरी संगठनको निष्पक्ष भूमिकाबारे धारणा राखेका थिए।
उनले आफूहरू राजनीतिक प्रभावबाट नभई प्रतिस्पर्धात्मक प्रक्रियाबाट छनोट भएर प्रहरी सेवामा आएको उल्लेख गर्दै ‘हामी भोट, टीका वा दारुभात खाएर आएका होइनौँ’ समेत बताएका थिए। भाषणपछि विद्यार्थीहरूबाट तालीसमेत बजाइएको भिडियोमा देखिन्छ।
भिडियो सार्वजनिक नगर्न उनले कार्यक्रममा आग्रह गरे पनि उक्त भिडियो सामाजिक सञ्जालमा फैलिएको थियो। त्यसपछि उत्पन्न भएको चर्चा र विवादका बीच जिल्ला प्रहरीले उनको अभिव्यक्ति कुन सन्दर्भमा आएको हो भन्ने विषयमा सामान्य सोधपुछका लागि बोलाइएको जनाएको छ।
