धनगढी । बैजनाथ सञ्चार प्रालिले संस्कृति संरक्षण, सामाजिक चेतना अभिवृद्धि र स्वस्थ समाज निर्माण गर्ने उद्देश्यले भदौ १७ गते धनगढीस्थित एसटीएस सिनेमा हलमा ‘सुदूरपश्चिम गाईजात्रा सिजन–२’ आयोजना गर्ने भएको छ।
मंगलबार आयोजित पत्रकार सम्मेलनमा सार्वजनिक कार्यक्रमका अनुसार राष्ट्रिय हास्यव्यंग्य कलाकार **मनोज गजुरेल**को विशेष प्रस्तुति रहनेछ भने सुदूरपश्चिमका स्थानीय कलाकारलाई पनि प्रतिभा प्रदर्शन गर्ने अवसर दिइनेछ।
कार्यक्रममा हास्यव्यंग्य, प्रहसन, गीत–संगीत र सांस्कृतिक प्रस्तुति समावेश हुनेछन्। भ्रष्टाचार, सामाजिक असमानता, महिला हिंसा, बालअधिकार र युवा पलायनजस्ता विषयलाई व्यंग्यमार्फत प्रस्तुत गरिने आयोजकले जनाएको छ।
प्रवेश शुल्क रु. १,००० तोकिएको छ भने विद्यार्थीलाई १० प्रतिशत छुटको व्यवस्था गरिएको छ। आयोजकले कार्यक्रममार्फत सुदूरपश्चिमको कला, भाषा, संस्कृति र कलाकारलाई राष्ट्रिय स्तरमा प्रवर्द्धन गर्ने लक्ष्य राखेको जनाएको छ।
