धार्मिक यात्राका क्रममा काठमाडौँबाहिर रहेका शिवाकोटीले आफू साइबर ब्युरोमा उपस्थित हुने बताएका छन्। उनले आफू काठमाडौँ फर्किरहेको र प्रहरी लगाएर खोज्न आवश्यक नरहेको प्रतिक्रिया दिएका छन्।
बिहीबार बिहान सामाजिक सञ्जालमार्फत प्रतिक्रिया दिँदै शिवाकोटीले सरकारको भय र भ्रमबाट आफू विचलित नहुने बताएका छन्। उनले लेखेका छन्, ‘सरकार तिम्रो भय र पारेको भ्रमले विचलित हुन्न, प्रहरी लगाएर खोज्नु पर्दैन, काठमाडौँ आउँदैछु।’
शिवाकोटीले केही दिनयता सामाजिक सञ्जालमार्फत सरकारले विधि र विधान मिचेर काम गरिरहेको तथा नेपाली कांग्रेसलाई अनावश्यक विवादमा फसाउन खोजेको भन्दै आलोचना गर्दै आएका छन्।
सरकारले डर र त्रास देखाएर सत्ता सञ्चालन गर्न खोजेको आरोप लगाउँदै उनले आफू कुनै दबाबमा नपर्ने बताएका छन्। साइबर ब्युरोले भने पत्रकार खड्काको उजुरीमाथि अनुसन्धानका क्रममा शिवाकोटीलाई बोलाएको स्रोतले जनाएको छ।
