तेस्रो संस्करणको नेपाल प्रिमियर लिग (एनपीएल) टी–२० क्रिकेटमा आज दुई खेल हुँदैछन्। दुवै खेल कीर्तिपुरस्थित त्रिभुवन अन्तर्राष्ट्रिय क्रिकेट मैदानमा सञ्चालन हुनेछन्।
आजको पहिलो खेलमा मध्याह्न १२ः३० बजे पोखरा एभेन्जर्स र विराटनगर किङ्स आमनेसामने हुनेछन्। प्लेअफमा पुग्ने सम्भावना जीवित राख्न दुवै टोलीका लागि यो खेल महत्वपूर्ण रहेको छ।
अङ्क तालिकाको छैटौँ स्थानमा रहेको विराटनगरले पाँच खेलमध्ये दुईमा जित र तीनमा हार बेहोरेको छ। यस्तै, आठौँ स्थानमा रहेको पोखराले पाँच खेल खेल्दा चारमा पराजय र एकमा मात्र जित निकालेको छ।
आजै अपराह्न ५ बजे हुने दोस्रो खेलमा कर्णाली याक्स र लुम्बिनी लायन्सबीच प्रतिस्पर्धा हुनेछ। प्लेअफ सम्भावना कायम राख्न कर्णालीलाई आजको खेल जित्नैपर्ने दबाब छ।
अङ्क तालिकाको सातौँ स्थानमा रहेको कर्णालीले पाँच खेलमध्ये दुईमा जित र तीनमा हार बेहोरेको छ। तेस्रो स्थानमा रहेको लुम्बिनीले भने पाँच खेलमा तीन जित, एक हार र वर्षाका कारण एक खेलमा अङ्क बाँडेको छ।
जारी प्रतियोगितामा आठ टोली सहभागी छन्। एनपीएलको तेस्रो संस्करण मङ्सिर ५ गतेसम्म सञ्चालन हुनेछ।
