धनुषामा इनारमा खसेको बाख्रा निकाल्न पसेका युवकको मृत्यु भएको छ । धनुषाको गणेशमान चारनाथ नगरपालिका १ का राजकुमार रौनियारका ३५ वर्षीय छोरा रामचन्द्र रौनियारको मृत्यु भएको हो ।
जिल्ला प्रहरी कार्यालय धनुषाका प्रहरी प्रवक्ता ओम प्रकाश खनालका अनुसार गोलघर नजिक रहेको सार्वजनिक इनारमा गत भदौ १३ गते बिहान एउटा बाख्रा खस्यो । बाख्रा निकाल्न रामचन्द्र पनि इनारमा पसेका थिए । तर, उनी एकघण्टासम्म ननिस्केपछि स्थानीयले प्रहरीलाई खबर गरेका थिए । प्रहरी पुगेर उद्धार गर्न खोज्दा उनको भित्रै मृत्यु भइसकेको थियो ।
इनारभित्रै निसासिएर उनको मृत्यु भएको हुन सक्ने प्रहरीको अनुमान छ । घटनाबारे थप अनुसन्धान भइरहेको प्रहरीले जनाएको छ ।
