बुटवल। कपिलवस्तुको कृष्णनगर नगरपालिका–२ स्थित बैंक रोडमा बजार अनुगमनका क्रममा एक व्यवसायीले शरीरमा मट्टितेल छर्केर आत्मदाहको प्रयास गरेका छन् ।
प्रहरीको टोलीले चामल बोकेको पिकअप नियन्त्रणमा लिएर आवश्यक कारबाहीका लागि भन्सार चलान गरेपछि गल्ला पसल सञ्चालक महेश अग्रहरीले आत्मदाहको प्रयास गरेका हुन् । स्थानीयका अनुसार उनले आफूलाई अन्याय भएको भन्दै शरीरमा मट्टितेल छर्केर आगो लगाउन खोजेका थिए।
प्रहरीले तत्कालै उनलाई जोगाएको थियो । शरीरमा आगो नलागे पनि मट्टितेलको असर देखिएपछि उनलाई उपचारका लागि सुरुमा स्थानीय अस्पताल लगिएको थियो । मुटुसम्बन्धी समस्या रहेको जानकारी पाएपछि थप उपचारका लागि रुपन्देहीको भैरहवास्थित मेडिकल कलेजमा पठाइएकोजिल्ला प्रहरी कार्यालय कपिलवस्तुका प्रवक्ता एवं प्रहरी नायब उपरीक्षक रिपेन्द्र सिंहले रातोपाटीलाई बताए ।
घटना आज बिहान करिब ११ बजेको हो।अग्रहरीले ल्याएको ६० बोरा चामलको बिलबिजक रहेको दाबी गरिएको भएपनि अनुगमन टोलीले आवश्यक कागजपत्र नभेटिएको भन्दै चामल नियन्त्रणमा लिएर भन्सार चलान गरेको थियो ।
भन्सार चलानपछि जरिवाना तिर्नुपर्ने त्रासमा अग्रहरीले आवेगमा आएर शरीरमा मट्टितेल छर्केर आगो लगाउन खोजेको डीएसपी सिंहको भनाइ छ ।
‘शरीरमा आगो लाग्नुअघि नै प्रहरीले उनलाई जोगाएको हो । मट्टितेलको असर देखिएपछि हाम्रो टोलीले उपचारका लागि भैरहवास्थित मेडिकल कलेजमा लगेको छ,’ डीएसपी सिंहले भने प्रहरीका अनुसार उपचाररत अग्रहरीको अवस्था सामान्य रहेको छ ।
