५ असोज, धनगढी । धनगढी पुगेर अनसन बसेका डाक्टर गोविन्द केसीलाई बुधबार उपचारका लागि १० औँ दिन काठमाडौँ लगिएको छ । जिल्ला प्रशासन कार्यालय कैलालीका सूचना अधिकारी शिवराज जोशीले श्रीएयरलाइन्सको विमान मार्फत केसीलाई काठमाडौँ लगिएको जानकारी दिए ।
सेती प्रादेशिक अस्पतालमा उपचाररत डाक्टर केसीको स्वास्थ्य अवस्था जटिल भएपछि चार दिन अघि अस्पतालले काठमाडौँको टिचिङ अस्पतालका लागि रेफर गरेको थियो तर डाक्टर केसीले जान नमानेपछि अहिलेसम्म सेतीमै थिए ।
मंगलबार उनलाई लैजान सेनाको स्काई ट्रक पनि आएको थियो तर रित्तै फर्किएको थियो । बुधबार भने उनी आफै काठमाडौँ जान राजी भएका हुन् । विभिन्न ७ बुँदे माग राख्दै डाक्टर केसी धनगढीको कृष्ण मन्दिरको धर्मशालामा अनसन बसेका थिए ।
