काठमाडौँ । रसुवाको भोटेकोशी नदीमा भीषण बाढी आएको ११ औँ दिनमा आज नुवाकोटको बेत्रावती बजारस्थित आनन्द श्रेष्ठको घरबाट ६४ वर्षीया चण्डिका श्रेष्ठलाई उद्धार गरी उपचारका लागि छाउनीस्थित नेपाली सेनाको अस्पताल ल्याइएको छ ।
जीवितै उद्धार गरिएकी श्रेष्ठलाई उपचारका लागि छाउनीस्थित नेपाली सेनाको अस्पताल लगिएको हो । नुवाकोटको विदुर नगरपालिका वडा नम्बर १० की श्रेष्ठलाई सशस्त्र प्रहरी बल, नेपालका प्रहरी निरीक्षक सुमन विकको कमान्डमा खटिएको टोलीले उद्धार गरेको थियो ।
उद्धारका क्रममा श्रेष्ठ अर्धअचेत अवस्थामा भेटिएकी थिइन् । उद्धारपश्चात् उनलाई हेलिकप्टरमार्फत त्रिशूलीस्थित नेपाली सेनाको मैबल ब्यारेक ल्याइएको थियो । त्यहाँ प्रारम्भिक उपचार गरेपछि थप उपचारका लागि उनलाई काठमाडौँ ल्याइएको नेपाल प्रहरीका प्रवक्ता अबिनारायण काफ्लेले जानकारी दिए ।
