धनगढी । कैलालीका प्रहरी नायब उपरीक्षक(डीएसपी) हिरा सिंह महराले कमान्ड गरेको इलाका प्रहरी कार्यालय मालाखेतीले मुद्दा फर्छौटमा उत्कृष्ट कार्य गरेको छ । इप्रका मालाखेतीले गम्भीर तथा जघन्य प्रकृतिका मुद्दा फर्छौटमा उत्कृष्ट कार्य गरेको नेपाल प्रहरी प्रदेश कार्यालय कञ्चनपुरले जनाएको छ ।
नेपाल प्रहरी प्रदेश कार्यालयकाअनुसार इप्रका मालाखेतीले चालु आर्थिक वर्षमा गम्भीर तथा जघन्य प्रकृतिका आठ समेत गरेर पेण्डिङ रहेका ११ मुद्दा फर्छौट गरि उत्कृष्ट कार्य गरेको छ ।
अनुगमन निरीक्षणका क्रममा मालाखेती प्रहरीले मुद्दा फर्छौटमा उत्कृष्ट कार्य गरेको भन्दै प्रदेश कार्यालयले मुद्दा चल्ने प्रदेशभरका सबै प्रहरी कार्यालयलाई पत्राचार गर्दै मालाखेतीले जस्तै कार्य गर्न निर्देशन दिएको छ । कार्यालय प्रमुख समेत रहेका प्रहरी वरिष्ठ उपरीक्षक(एसएसपी) दिपेन्द्र शाहीले मातहतका मुद्दा चल्ने सबै कार्यालयलाई परिपत्र गर्दै उक्त निर्देशन दिएका हुन् ।
डीएसपी महराले मालाखेतीको कमान्ड सम्हालेयता उत्कृष्ट कार्य सम्पादन भइरहेको हो भने मुद्दा पर्छौटको अवस्था उत्कृष्ट देखिएको हो । राजमार्ग तथा बजार क्षेत्र रहेको अत्तरियामा तुलनात्मक रुपमा अन्य ठाउँको भन्दा मुद्दाको चाप बढि हुने गरेको समेत प्रहरी अधिकारी बताउँछन् ।
