काठमाडौं । सांसद खगेन्द्र सुनारले आन्दोलनमा सरकारी स्रेस्ता जलेको बहानामा सरकारी सम्पत्ति मिनाहा गर्न नसकिने बताएका छन् ।
सार्वजनिक लेखा समितिको बैठकमा बोल्दै उनले डेढ खर्ब रुपैयाँ बराबरको लेखा परीक्षण हुन नसकेको सन्दर्भमा कसैलाई पनि सुनपानी छर्कन नमिल्ने बताए । ‘कार्यालय कति जलेको हो, कागजात सबै जलेको हो कि, अलिकति मात्र जलेको हो, त्यो त हामीले हेर्न पाउनु पर्यो,’ उनले भने ।
विगतमा माओवादी आन्दोलनलाई दोष लगाउँदै गाविस सचिवहरुले गर्ने बदमासी उनले स्मरण गरे । त्यतिबेला माओवादीले कार्यालय जलायो भन्दै सदरमुकाममा घर ठड्याउने गरेको प्रवृत्ति देखिएको उनले बताए ।
पश्चिम नेपालमा भूकम्प जाँदा जनताका घर ढलेको अवस्थामा प्रमुख जिल्ला अधिकारीहरुले काठमाडौंमा घर ठड्याएको भन्दै यो प्रवृत्तिलाई आँखा चिम्लन नमिल्ने उनले बताए ।
