धनगढी । कञ्चनपुरमा सशस्त्र प्रहरीका जवान मृत भेटिएका छन् । मृत भेटिनेमा सशस्त्र प्रहरी जवान भरत धानुक रहेको प्रहरीले जनाएको छ ।
जिल्ला प्रहरी कार्यालयका प्रवक्ता प्रहरी नायब उपरीक्षक(डीएसपी) टेकबहादुर रावतले शुक्लाफाँटा नगरपालिका–२ घर भएका धानुक आइतबार दिउँसो साढे १२ बजे घरबाट करीब दुई किलोमिटरको दूरीमा मृत भेटिएका हुन् ।
उनकाअनुसार धानुक जोनापुरस्थित नर्सरीमा मृत भेटिएका थिए । रुखमा झुन्डिएको अवस्थामा मृत भेटिएपनि घटनाबारे थप अनुसन्धान भइरहेको प्रहरीले जनाएको छ ।
दार्चुलामा कार्यरत धानुक केही दिनअघि मात्र विदामा कञ्चनपुरको झलारीस्थित घर आएका थिए । उनी शनिबार साँझदेखि सम्पर्कविहीन भएपछि परिवारले प्रहरीलाई खोजीका लागि खबर गरेको थियो । खोजीका क्रममा उनी आइतबार दिउँसो मृत भेटिएका हुन् ।
धानुक विवाहित भएपनि श्रीमती बाहेक छोराछोरी भने नरहेको पाइएको प्रहरीले जनाएको छ ।
