झापाको बिर्तामोड नगरपालिका–२ रामचोकस्थित बडी ग्यारेज (ठूला सवारीसाधन मर्मत केन्द्र)को क्यान्टिनमा आगलागी हुँदा एक जनाको जलेर मृत्यु भएको छ ।
बिहीबार बिहान करिब ४:१० बजे विद्युत् सर्ट भएर आगलागी हुँदा क्यान्टिनमा काम गर्ने गौरीगञ्ज गाउँपालिका–२ निवासी ६५ वर्षीय रुद्रबहादुर तामाङको मृत्यु भएको प्रहरीले जनाएको छ । बिर्तामोड नगरपालिका–४ निवासी रबि राजवंशीले सञ्चालन गरेको उक्त बडी ग्यारेज ध्रुव भट्टराईको जग्गामा रहेको टिनको छानो भएको घरमा सञ्चालित थियो ।
आगलागीको सूचना प्राप्त हुनासाथ इलाका प्रहरी कार्यालय अनारमनीबाट प्रहरी टोली घटनास्थलमा पुगेको थियो । दमकल र स्थानीयवासीको सहयोगमा बिहान करिब ४:३० बजे आगो पूर्ण रूपमा नियन्त्रणमा लिइएको थियो ।
आगलागीबाट क्यान्टिनभित्र रहेका भाँडाकुँडा, लत्ताकपडा, तीनवटा खसीबाख्रा र नगद एक लाख रूपैयाँ पनि जलेर नष्ट भएका छन् । प्रारम्भिक विवरणअनुसार क्यान्टिनमा करिब तीन लाख रूपैयाँ बराबरको क्षति भएको छ ।
यसैगरी, बडी ग्यारेजसँगै जोडिएको राजेन्द्र अग्रवालले सञ्चालन गरेको मार्बल तथा टायल्सको गोदाममा समेत सामान्य आगलागी भएको प्रहरीले जनाएको छ ।
आगलागीबाट भएको अन्य क्षतिको विवरण संकलन भइरहेको छ भने घटनाबारे थप अनुसन्धान जारी रहेको प्रहरीले जनाएको छ ।
