२५ भदौ, धनगढी । सुदूरपश्चिम प्रदेश सरकारले दार्चुलामा बाढीपहिरोमा परेर ज्यान गुमाएका परिवारलाई एक लाख रुपैयाँ दिने भएको छ । राहत सामाग्री लिएर दार्चुला पुगेका प्रदेशका आन्तरिक मामिला तथा कानुनमन्त्री डा.रणबहादुर रावलले मृतकका परिवारलाई जनही एक लाख रुपैयाँ दिने बताएका हुन् ।
उनले बाढीपहिरोमा परी घाइते भएकालाई उपचारका लागि पनि जनही ५० हजार दिने समेत घोषणा गरेका छन् । दार्चुलामा अविरल वर्षापछि शुक्रबार राति आएको बाढीपहिरोमा परेर ५ जनाको मृत्यु भएको छ भने १० जना बेपत्ता छन् । घाइते ८ जनाको जिल्ला अस्पतालमा उपचार भइरहेको छ ।
