३१ लाखको मुद्दा दुई चार लाखमा मिलाउन सुदूरपश्चिमका मन्त्री सोडारी पत्नीको प्रस्ताव

६ असोज, धनगढी । नेकपा एकीकृत समाजवादी कैलालीका उपसचिव दीर्घराज जोशी पत्नी अनिताको ३१ लाखको चेक अनादर मुद्दामा सुदूरपश्चिमका भौतिक पूर्वाधार विकास मन्त्री दीर्घबहादुर सोडारी पत्नी गीता सोडारीको नाम पनि जोडिएको छ ।

जिल्ला अदालत कैलालीले पीडित मायादेवी विष्टलाई प्रतिवादी अनिताले तिर्नुपर्ने बिगो नतिरेको अवस्थामा एक वर्ष कैद सजाय हुने फैसला सुनाइसकेका बेला मन्त्री  सोडारी पत्नी गीताले मिलाउन भूमिका खेलेको आरोप लगाइएको छ ।

‘दीर्घ मन्त्री ज्यूको श्रीमती गीताले मेरो पसलमा आएर मलाई अनिताले त्यति ठूलो रकम तिर्न सक्दैन् । २÷४ लाख तिरेर कुरा मिलाऔँ भन्नुभएको थियो,’ विष्टले भनिन्, ‘उहाँले कसैलाई जेल हालेर तिमीलाई फाइदा हुदैन् । अहिलेको कुरा मात्र हेरेर मात्र हुदैन पछिसम्म सोच्नुपर्छ । भोलि समस्या पर्न सक्छ भनेर मलाई नजानिदो किसिमले धम्क्याउनुभयो ।’

विष्टले अनिताका श्रीमान मन्त्री सोडारीका विश्वास पात्र भएको सुनेकाले उनीहरुले नै संरक्षण दिएर प्रतिवादीलाई लुकाएको आरोप लगाएकी छन् । सरोकार नै नभएको ‘उहाँको यो केसमा कुनै स्वार्थ छैन भने मलाई खोज्दै मेरो पसलमा आएर यसरी मिलाऔँ उसरी मिलाऔँ भनेर भन्छ त ?,’ उनले भनिन्, ‘मन्त्रीकै आडमा उनीहरुले नै अनितालाई लुकाएर राखेको छ ।’

सोडारी पत्नी गीताले पनि विष्टलाई २÷४ लाखको कुरा भए मिलाउन सकिने र मुद्दा÷मामिलाको झन्जटमा नपर्न आग्रह गरेको स्वीकार गरेकी छन् तर त्यसमा व्यक्तिगत स्वार्थ नभएको दाबी उनको छ । ‘अनिता जोशी घरमा छैन । त्यो बहिनीसँगको कारोबारको मुद्दा थियो भन्ने कुरा थाहा पाएपछि के रहेछ त भनेर बुझ्न गएकी थिए,’ सोडारीले भनिन्, ‘२÷४ लाखको कुरा हो भने दुवै पक्ष मिल्दा राम्रो हुने भनेकै हुँ । अरु मेरो कुनै स्वार्थ छैन ।’

मायादेवी विष्टकाअनुसार उपसचिव जोशीकी श्रीमती अनिताले एक महिनामा फिर्ता गर्ने शर्तमा २०७५ सालमा ३१ लाख रुपैयाँ सापटी लिएकी थिइन् । अनिताले आफ्ना नाममा रहेको धनगढीको ज्याति विकास बैँकको दुई वटा चेक दिएकी थिइन् ।

जोशीले विष्टको नाममा २०७५ साउन १० मा भुक्तानी हुनेगरी २९ लाख सात हजारको एउटा र २०७५ भदौ २८ मा भुक्तानी हुनेगरी दुई लाखको चेक दिएकी थिइन् । तर चेक नसाटिएपछि विष्टले अदालतमा चेक अनादरको मुद्दा दायर गरेकी थिइन् ।

उक्त मुद्दाको फैसला गर्दै अदालतले वार्षिक १० प्रतिशत ब्याज समेत गरेर सावा रकम वादी पक्षलाई तिर्न आदेश दिएको थियो । अदालतको आदेशअनुसार अनिताले १५ लाख रुपैयाँ पर्ने जग्गा विष्टको नाममा नामसारी गरिदिएपनि अझै २८ लाख नतिरेको भन्दै विष्टले गत बैशाखमा पुनः निजलाई सजाय गराइ पाउ भनेर निवेदन दिएकी थिइन् । उनको निवेदनमाथि सुनवाई गर्दै बाँकी बिगो रकम नतिरेमा जोशीलाई एक वर्ष कैद सजाय हुने फैसला सुनाएको थियो ।

उनको नाममा पक्राउ पुर्जी जारी भएपनि विगत तीन महिनादेखि फरार छिन् । खोजीमा प्रहरीले असहयोग गरेको पीडितको गुनासो छ भने प्रहरीले खोजी भइरहेको जनाएको छ ।

यी समाचार पढ्नुस्

नेकपा (एस) कैलालीका उपसचिव पत्नीको मुद्दा : १५ लाखको जग्गा नामसारी, बाँकी २८ लाख नतिर्दा कैद

नेकपा (एस) कैलालीका उपसचिव जोशीकी श्रीमतीविरुद्ध ३१ लाखको चेक अनादर मुद्दा