२९ असोज, धनगढी । नेकपा एमालेले स्वतन्त्र उम्मेदवारलाई सघाएको भन्दै चुनावी तालमेल भंग गरेपछि नेपाली कांग्रेस (बिपी) ले नेकपा एकीकृत समाजवादीसँग तालमेल गर्ने भएको छ ।
शनिबार दुबै पार्टीले डडेल्धुरामा संयुक्त पत्रकार सम्मेलन गर्दै मंसिर ४ गते हुने निर्वाचनमा तालमेल गरेर जाने सहमती भएको जानकारी दिएका छन् ।
प्रतिनिधिसभामा कांग्रेस (बिपी) का कर्णबहादुर मल्ललाई नेकपा एकीकृतले सघाउनेछ भने उसले प्रदेशसभामा स्वतन्त्र उम्मेदवारी दिएका नेकपा एकीकृत समाजवादीका नेता डा. तारा जोशीलाई सहयोग गर्नेछन् ।
जोशीले पार्टी परित्याग गरेर स्वतन्त्र उम्मेदवारी दिएपनि तालमेल गर्ने सहमतीमा उनीसहित नेकपाका जिल्ला अध्यक्ष कबिन्द्र विष्टले समेत हस्ताक्षर गरेका छन् ।
जोशी, कांग्रेस (बिपी) र नेकपा एकीकृत समाजवादीका अध्यक्ष विष्टबीच ६ बुँदे सहमती भएको छ ।
शुक्रबार मात्र नेकपा एमालेले समझदारी विपरीत कांग्रेस (बिपी) ले स्वतन्त्र उम्मेदवारलाई सघाउने भन्दै तालमेल ताडेको घोषणा गरेको थियो । त्यसको भोलिपल्टै उनीहरुबीच सहमती भएको हो ।
