सुदूरपश्चिमको बजेट संशोधन नभए छलफलमा भाग नलिने विपक्षी दलहरुको निर्णय

Nisharg hospital

२८ असार, धनगढी । सुदूरपश्चिममा प्रमुख प्रतिपक्षी नेकपा एमालेसहितका दलले प्रदेश सरकारले ल्याएको बजेट संशोधन नगरेको अवस्थामा प्रदेशसभाको बैठकमा सहभागी हुन नसकिने निर्णय गरेका छन् । मंगलबार बिहान बसेको प्रमुख प्रतिपक्षी दल एमाले, जनता समाजवादी पार्टी र लोकतान्त्रिक समाजवादी पार्टीको बैठकले बजेट संशोधन गर्नुपर्ने, सरकार संशोधन गर्न तयार नभएको अवस्थामा प्रदेशसभाको बैठक बहिष्कार गर्ने निर्णय गरेको हो ।

बैठकमा सहभागी एक जना प्रदेशसभा सदस्यकाअनुसार बजेट संशोधनको मागसहित प्रतिपक्षी दलले १४ बुँदे ध्यानाकर्षण पत्र मुख्यमन्त्री त्रिलोचन भट्टलाई बुझाउने तयारी गरेका छन् । नेकपा एमालेका प्रमुख सचेतक लिलाधर भट्टले पनि विपक्षी दलको संयुक्त बैठक भर्खरै सम्पन्न भएको बताउँदै छलफलका लागि मुख्यमन्त्री भट्टले बोलाएकाले मुख्यमन्त्री तथा मन्त्रीपरिषद्को कार्यालय गइरहेको जानकारी दिए ।

‘प्रदेशसभामा प्रतिनिधित्व गर्ने हामी प्रतिपक्षी दलको संयुक्त बैठक बसेर बजेट संशोधन लगायतका विषयमा केही निर्णय गरेका छौँ,’ भट्टले अनलाइनखबरसँग भने, ‘ती निर्णयसहित अहिले मुख्यमन्त्री ज्यूले बोलाउनुभएको छलफलमा सहभागी हुन जादैछौँ । हाम्रा मागबारे सरकारको धारणा के आउँछ ? त्यसपछि थप कदमबारे परामर्श गछौँ ।’ अहिलेको बजेट सुदूरपश्चिम प्रदेशको विकास र समृद्धि भन्दा सरकारका मन्त्रीहरु समृद्ध बन्नेगरी ल्याइएकाले सच्याउनुपर्ने निष्कर्ष प्रतिपक्षी दलले निकालेका छन् ।

बजेटमाथि प्रतिपक्षी दल भन्दा पनि सत्तारुढ सांसदहरुबाट बढि आलोचना खेपिरहेको प्रदेश सरकारले अहिलेसम्म छलफल गर्न सकेको छैन । प्रदेशसभा सदस्यहरुकै विरोधका कारण पटक–पटक बैठक स्थगीत हुँदै आएको छ ।

बजेटमाथि छलफल गर्न सोमबार दिउँसो ३ बजे बोलाइएको बैठक सञ्चालनका लागि गणपूरक संख्या नपुगेको तथा प्रतिपक्षी दल सहभागी नभएको भन्दै सभामुख अर्जुनबहादुर थापाले मंगलबार बिहान ११ बजेसम्मका लागि स्थगीत गरेका थिए । तर अहिलेसम्म बजेटमाथि छलफल गर्ने विषयमा दलहरुबीच ठोस सहमती नभइसकेका कारण फेरी प्रदेशसभाको बैठक अनिश्चित बनेको छ ।

 

 

Navjiwan hospital adv
याे पनि हेर्नुस्
Loading...