काठमाडौं । गुगलको ‘एन्ड्रोइड पल्स’ नामको एप केही एन्ड्रोइड फोनमा प्ले स्टोरको अपडेट सूचीमा देखिन थालेको छ ।
तर, यो फेसबुक, टिकटक वा क्यामेराजस्तो प्रयोगकर्ताले खोलेर चलाउने एप होइन । यो फोनको ब्याकग्राउन्डमा बसेर काम गर्ने गुगलको सर्भिस हो, जसले फोन तथा एपहरूले ब्याट्री, मेमोरी र फोनमा के असर गरिरहेको छन् भनेर बुझ्छ । तिनमा काम गर्ने क्षमता अस्वाभाविक रूपमा प्रयोग गरिरहेका छन् कि छैनन् भन्ने पत्ता लगाउन सहयोग गर्छ ।
गुगलले प्ले स्टोरमा दिएको विवरणअनुसार एन्ड्रोइड पल्सले फोनको महत्वपूर्ण स्रोत बढी वा अस्वाभाविक रूपमा खपत भइरहेको अवस्था पहिचान गर्न आवश्यक नियम उपलब्ध गराउँछ ।
सामान्य भाषामा भन्नुपर्दा, कुनै एपले अचानक धेरै ब्याट्री सकाउन थाल्यो, फोनलाई धेरै तातो बनायो, धेरै मेमोरी खायो वा ब्याकग्राउन्डमा अनावश्यक रूपमा चलिरह्यो भने त्यस्तो गतिविधि पहिचान गर्न यसले एन्ड्रोइडलाई सहयोग गर्छ ।
यसले के फाइदा गर्छ ?
धेरै प्रयोगकर्ताले फोनको ब्याट्री अचानक चाँडै सकिने, फोन ढिलो चल्ने वा बिना कारण तात्ने समस्या भोग्छन् । तर यसको वास्तविक कारण कुन एप हो वा फोनको कुन भागमा समस्या आएको हो भनेर थाहा पाउन सजिलो हुँदैन ।
एन्ड्रोइड पल्सले यस्ता समस्या सिर्जना गर्ने एप वा फोनको भित्री प्रक्रियाको अस्वाभाविक व्यवहार पहिचान गर्न सहयोग गर्न सक्छ । यसबाट गुगलले समस्या भएका एपबारे छिटो जानकारी पाउन, आवश्यक सुधार गर्न तथा एन्ड्रोइडलाई थप स्थिर बनाउन सहयोग पुग्न सक्छ ।
यसले प्रयोगकर्ताको फोन आफैं सफा गर्ने, भाइरस हटाउने वा एकैछिनमा ब्याट्री बचाउने एपको रूपमा काम गर्दैन । यसको मुख्य काम सम्भावित समस्याबारे पहिचान गर्नु हो । त्यसकारण धेरै प्रयोगकर्ताले यो एप कहिल्यै आफैँ खोलेर चलाउनुपर्ने हुँदैन ।
तपाईंको फोनमा देखिएको छैन ? किन ?
तपाईंको फोनमा यो सेवा नदेखिएको पनि हुनसक्छ । यसरी एन्ड्रोइड पल्स नदेखिनु तपाईंका लागि यो सेवा सधैंका लागि बन्द गरिएको भन्ने अर्थ होइन । गुगलले यो सेवा कुन देश, कुन फोन वा कुन एन्ड्रोइड संस्करणका लागि उपलब्ध गराउने भन्ने विस्तृत सूची सार्वजनिक गरेको छैन ।
यस्ता फोनभित्रै चल्ने सेवा वा अपडेट गुगलले प्रायस् सबै प्रयोगकर्तालाई एकैपटक पठाउँदैन । कम्पनीले पहिले सीमित प्रयोगकर्ताका फोनमा परीक्षण गर्न सक्छ र त्यसपछि क्रमशस् अन्य फोन तथा क्षेत्रमा विस्तार गर्नसक्छ । फोनको ब्रान्ड, मोडेल, एन्ड्रोइडको संस्करण, गुगल प्ले प्रणालीको अपडेट र मोबाइल सेवा प्रदायकजस्ता कारणले पनि एउटै देशभित्र सबै फोनमा एकै समयमा सेवा नदेखिन सक्छ ।
हालका रिपोर्टमा एन्ड्रोइड पल्स केही प्रयोगकर्ताको प्ले स्टोरमा अपडेटका रूपमा देखिए पनि सबै एन्ड्रोइड फोनमा आएको पुष्टि भएको छैन । त्यसैले तपाईंको फोनमा नदेखिएको अस्वभाविक मान्नुपर्दैन ।
डाउनलोड गर्नुपर्छ ?
पर्दैन । एन्ड्रोइड पल्स फोनको पृष्ठभूमिमा काम गर्न बनाइएको गुगलको सेवा भएकाले यसलाई खोजेर छुट्टै डाउनलोड गरेर वा खोलेर चलाउन आवश्यक छैन । तपाईंको फोनका लागि यो सेवा उपलब्ध भएमा प्ले स्टोर वा फोनको सामान्य अपडेटमार्फत आफैं आउन सक्छ ।
त्यसैले अनौपचारिक वेबसाइट वा अपरिचित स्रोतबाट यसको एप फाइल डाउनलोड गर्नु उपयुक्त हुँदैन ।
