काठमाडौं । भूमि व्यवस्था, सहकारी, संघीय मामिला तथा सामान्य प्रशासनमन्त्री प्रतिभा रावलले जनताका समस्या बुझ्न मन्त्री आफैँ जनताको घरदैलोमा पुग्नुपर्ने बताएकी छन् ।
चितवनको भरतपुर विमानस्थलमा पत्रकारसँग कुरा गर्दै मन्त्री रावलले सरकारका काम र आगामी योजनाबारे जनतालाई जानकारी गराउन आफू आएको बताइन् । भूमिहीन नागरिक र सहकारी पीडितका समस्या समाधान गर्नु सरकारको प्राथमिकता रहेको उनले बताइन् । समस्याग्रस्त सहकारीका बचतकर्ताको रकम फिर्ता गर्ने प्रक्रिया सुरु भइसकेको उल्लेख गर्दै उनले यसलाई तीव्रता दिइने बताइन् ।
लामो समयदेखि बचत फिर्ता नपाएर पीडामा रहेका नागरिकको रकम छिटो फिर्ता गर्नुपर्नेमा जोड दिँदै मन्त्री रावलले बचतकर्ताको रकम फिर्ता नगर्ने सहकारीलाई ताकेता गर्नुपर्ने बताइन् ।
सरकारले जनताको हितमा गरिरहेका काम र आगामी कार्ययोजनाबारे नागरिकलाई जानकारी दिन तथा उनीहरूका समस्या प्रत्यक्ष सुन्न आफू जनतामाझ पुगिरहेको उनको भनाइ छ ।
