-शिवराज कलौनी
आफ्नि उक्तिले नाँइ भएइ कि तोइ नहुनदिन्या छन ?
पाकिकि खुस्बु नाइ आइ तोइलाई कोइ कूःन दिन्या छन्
छुयान्द भइ भण्ण्या खुदै आफु छुया हुन्या छन्
किडा पडिगया भण्ण्या आफ्ना हड गन् अया छन्
तसो नाइ भयो त बता पुइ
दवाइ लै स्प्रे गरेइको हो मुइले
फल टिप्द्या बेला ऐल तैले
डि ग्रेड कस्याँ लेएइ अइले
बताइ दे आमराजा तैँले
000
तेरो मुन्डो निमोद्द्या बटौन्या छन् औँलो औरतिर छ
तोइलाइ वर्णशंकर बनौन्या छन् मुन्डो उब हात दना तिर छ
ढुँवा हाँणि फुलै झडौन्या वाला छन् मुख इथ आँखिचाल नेतातिर छ
डास्ल पडिगै,हावा चल्यो भण्ण्या वाला छन् एक हात झोलामा अर्खो लपेतातिर छ
तसो नाइ भयो त बता पुइ
दवाइ लै स्प्रे गरेइको हो मुइले
फल टिप्द्या बेला ऐल तैले
डि ग्रेड कस्याँ लेएइ अइले
बताइ दे आमराजा तैँले
000
तैँ त हुन्थेइ कि जान्थेइ तोइ निमोद्द्या झिक धेक्या मुइ ले
तै त दिन्थेइ कि खान्थेइ ,तेरा जुणिउनि सराप घोप्ट्यौन्या धेक्या मुइ ले
तै त कूःन्थेइ कि सुकन्थेइ तेरा नाँउमा राजनीति गद्द्या धेक्या मुइले
तै त रन्थेइ कि भन्थेइ तेराइ सेःल बस्स्या ले थूकथाक रे नखित्तु खित्ता धेक्या मुइले
तसो नाइ भयो त बता पुइ
दवाइ लै स्प्रे गरेइको हो मुइले
फल टिप्द्या बेला ऐल तैले
डि ग्रेड कस्याँ लेएइ अइले
बताइ दे आमराजा तैँले
000
तेरो रुख धेकि मान्स रिसले जल्याका धेक्या मुइ ले
हिर्सो हङकार,डिठ मुठ ,कला कोइला बटामा खित्यो धेक्या मुइले
तोइ धेकि निकोइ मन्न्या वाला लै निको नमान्न्या धेक्या मुइ ले
को जलमल दिन्छ,को अग्डास् तोइलाइ होस आजै नऔन्या धेक्या मुइले
तसो नाइ भयो त बता पुइ
दवाइ लै स्प्रे गरेइको हो मुइले
फल टिप्द्या बेला ऐल तैले
डि ग्रेड कस्याँ लेएइ अइले
बताइ दे आमराजा तैँले
000
गोडमेल गरेइको हो
तेरा जडाइनि पानि लै हालेइको हो
चैतका मैना रुखभरि फुल लै फुल्याइका हुन
तनै फुलका वरिपरि छान,किडा मिडा झुल्याइका हुन्
फल टिप्द्या बेला ऐल तैले
डि ग्रेड कस्याँ लेएइ अइले
बताइ दे आमराजा तैँले
000
मुख्याका चेलाले लै रुखको अनुगमन गरेइको हो
कोल्ड स्टोरको बौस्या लै डिल गरि गएइको हो
कृषिको हाकिम लै आम फल्याइ हो भणिगयो
एइ रुखमा कति दना रन्ना एक दुइ लै गणिगयो
दवाइ लै स्प्रे गरेइको हो मुइले
फल टिप्द्या बेला ऐल तैले
डि ग्रेड कस्याँ लेएइ अइले
बताइ दे आमराजा तैँले
000
फलको राजा लै तएइ आम -सपले भणेइको हो
दाँत बुजा अडिनाले लै ,कमाइ तैँले गरेइको हो
डसेरि ,बम्बै ,चम्सा,बनर्या सपै भाइ क्याले डर्या
डाल पडेको छिचोलेइ,पोर सालै लै भकारी भर्या
दवाइ लै स्प्रे गरेइको हो मुइले
फल टिप्द्या बेला ऐल तैले
डि ग्रेड कस्याँ लेएइ अइले
बताइ दे आमराजा तैँले
000
नेतानको पेट तँएइले भरेइ
अचारका डब्बा तएइले भरेइ
चटनी, मुरब्बा,जुस,फेन्टा,सिरप,रसना दिएइ
भर्ना भएइ,फोरम भरेइ, परीक्षा लै दिएइ
मालिकका हात रिजल्टमा डि ग्रेड लेएइ
दवाइ लै स्प्रे गरेइको हो मुइले
फल टिप्द्या बेला ऐल तैँले
डि ग्रेड कस्याँ लेएइ अइले
बताइ दे आमराजा तैँले
000
फेसबुक तेराइ नाँउको,टिकटक तेराइ गाँउको
सराप तेराइ ठाउँको, इन्स्टाग्राम तोएइ माउको
फट्याका पैन्ट,कुर्ति डिजाइनमा तेरोइ फुटो
कलास पडाउनोइ थ्यू पासले साँचो न त झुटो
दवाइ लै स्प्रे गरेइको हो मुइले
फल टिप्द्या बेला ऐल तैले
डि ग्रेड कस्याँ लेएइ अइले
बताइ दे आमराजा तैँले
