काठमाडौं । नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले नेकपा एमालेसँग तत्काल पार्टी एकताको सम्भावना नरहेको बताएका छन् ।
नेकपाको राष्ट्रिय जागरण अभियान शुभारम्भका अवसरमा आयोजित पत्रकार सम्मेलनमा बोल्दै प्रचण्डले इतिहास, पृष्ठभूमि र विगतका विषयमा समीक्षा नगरी एमालेसँग एकता हुन नसक्ने बताएका हुन् ।
‘विचार मिल्नेसँग मिल्न डराउँदैनौँ भन्नुको अर्थ सबैसँग मिलिहाल्छौँ भनेको होइन । एमालेसँग तत्काल पार्टी एउटै हुने सम्भावना छैन,’ उनले भने ।
प्रचण्डले आफूहरू विगतका गल्ती स्वीकार गर्न तयार भए पनि एमाले अध्यक्ष केपी शर्मा ओली त्यसका लागि तयार नभएको आरोप लगाए । कांग्रेस र एमालेको गठबन्धनले देशमा दुर्घटना निम्त्याउने आफूहरूको भनाइ सही साबित भएको उनको दाबी थियो ।
ओली नेतृत्वको पार्टी र आफ्नो पार्टीबीच के फरक छ भन्ने पत्रकारको प्रश्नमा प्रचण्डले आफ्नो पार्टी भ्रष्टाचारविरुद्ध लड्ने गरेको तर भ्रष्टाचारलाई संरक्षण गर्ने पार्टीसँग आफूहरूको तुलना गर्न नमिल्ने बताए ।
उनले विगतको माओवादी नेपाली कम्युनिस्ट पार्टीभित्रै रहेको दाबीसमेत गरे । साथै, बालेन शाह नेतृत्वको वर्तमान सरकारले जनताका अपेक्षा पूरा गर्न नसक्दा जनतामा निराशा बढेको उनको भनाइ थियो ।
