हुम्ला। कञ्चनपुर जिल्लाको भारतसँगको सिमाना जोडिएको गड्डाचौकीबाट भारत लैजाने क्रममा उद्धार गरिएका हुम्लाका बालबालिकालाई जिल्ला प्रहरी कार्यालय हुम्लाले अभिभावकको जिम्मा लगाएको छ । कञ्चनपुरबाट पैदलमार्ग हुँदै बिहीबार जिल्ला प्रहरी कार्यालयमा उद्धार गरी ल्याइएका ती बालबालिकाका अभिभावकलाई शुक्रबार कानुनी सचेतनासहित कागज गरेर जिम्मा लगाइएको हो ।
नौ बालिका र १६ बालक गरी २५ जनालाई कञ्चनपुर जिल्लाबाट उद्धार गरेर हुम्ला जिल्ला ल्याएलगत्तै अभिभावकको जिम्मामा घर पठाइएको हुम्लाका प्रहरी निरीक्षक युवराज ढकालले बताउनुभयो । यसरी बालबालिकालाई बाहिर पठाउने अभिभावकलाई कानुनी रूपमा सजाय हुने सचेतना दिइएको छ, प्रहरीले त्यहाँ पुगेका अभिभावकलाई बालबालिका जिम्मा लगाएर दुई जना सुरक्षाकर्मीसँगै हुम्ला पठाएको थियो ।
बालबालिकाको अभिभावकसँग पुनर्मिलन कार्यक्रममा आठ वर्षको छोरा भारत पठाउनुभएका अभिभावक जयकृष्ण बुढाले प्रलोभनमा परेर पठाइएको र गल्ती भएको स्वीकार गर्नुभएको थियो । गत असोज २७ गते सिमकोट गाउँपालिका– ८ को स्याँडा गाउँबाट पैदल मार्गबाट लगेर नेपालगन्ज हुँदै कञ्चनपुरको गड्डा चौकी नाकाबाट भारतमा लैजाने क्रममा भारतीय प्रहरी र नेपाल प्रहरीको सहयोगमा ती बालबालिकाको उद्धार गरिएको थियो । यो कार्यमा शान्ति पुनस्र्थापना गृहले पनि सहयोग गरेको थियो ।
त्यसपछि १४ दिनसम्म बालबालिकालाई कञ्चनपुरको बाल गृहमा राखिएको थियो । यसै गरी पढाइदिने भन्दै भारत लगिँदै गरेको अवस्थामा कञ्चनपुर जिल्लाको गड्डाचौकी नाकाबाट फिर्ता गरिएका बालबालिका लिने चार जनाविरुद्ध मुद्दा दर्ता गरिएको छ । चारै जनाविरुद्ध मानव बेचबिखनविरुद्धको मुद्दा कञ्चनपुर प्रहरी अदालतमा दर्ता गरेको छ ।
बालबालिकालाई भारत लैजाने मुख्य व्यक्तिसहित चार जनाका नाममा मानव बेचबिखनसम्बन्धी मुद्दा दर्ता गरिएको गृहका क्षेत्रीय संयोजक सञ्जित सिंहले बताउनुभयो ।
