काठमाडौं । बंगलादेशको वस्त्र तथा कपडा (रेडीमेड गारमेन्ट) उद्योगमा आबद्ध करिब १० लाख मजदुरहरू आफ्नो न्यूनतम मासिक तलब वृद्धिको माग गर्दै सडकमा उत्रिएका छन्। राजधानी ढाकासहित देशका प्रमुख औद्योगिक क्षेत्रहरूमा भइरहेको प्रदर्शनका कारण ५२९ वटा फ्याक्ट्रीहरूमा पूर्ण रूपमा काम ठप्प भएको छ ।
बीबीसी बंगलाका अनुसार, गत आइतबार मात्रै देशका करिब ९ लाख ८७ हजार मजदुरहरू फ्याक्ट्रीमा काम गर्न गएनन्। आन्दोलनकारी मजदुरहरूले हालको १२ हजार ५०० टका रहेको मासिक न्यूनतम तलब बढाएर ३० हजार टका पुर्याउनुपर्ने मुख्य माग राखेका छन्। खानेकुरा, घरभाडा, यातायात र स्वास्थ्य सेवाको तीव्र महँगीले गर्दा आफ्नो क्रयशक्ति निकै घटेको मजदुरहरूको गुनासो छ।
ढाका नजिकैका सावर, अशुलिया, मिरपुर र गाजीपुर क्षेत्रमा भएका प्रदर्शनका क्रममा तोडफोड, सडक जाम र प्रहरीसँग उग्र झडपका घटनाहरू घटेका छन्। स्थिति नियन्त्रणमा लिन प्रहरीले लाठीचार्ज गर्नुका साथै अश्रुग्यास प्रहार गरेको समाचारमा उल्लेख छ । प्रदर्शनका क्रममा केही प्रहरी गाडीहरूमा आगजनी गरिनुका साथै कालियाकैरमा एक झुट गोदाममा समेत आगो लगाइएको गृह मन्त्रालयले जनाएको छ।
अचानक चर्किएको यो असन्तोषलाई लिएर प्रधानमन्त्री तारिक रहमानले सचिवालयमा मन्त्री र सल्लाहकारहरूसँग आपत्कालीन उच्चस्तरीय बैठक गरेका छन्। बैठकपछि गृह मन्त्री सलाहुद्दीन अहमद र श्रम तथा रोजगार मन्त्री आरिफुल हक चौधरीले हिंसालाई कूटनीति र दृढताका साथ काउन्टर दिने चेतावनी दिए।
गृहमन्त्री अहमदले आन्दोलनमा केही नकाबपोश व्यक्तिहरू प्रवेश गरेर तोडफोड र हिंसा मच्चाएको तथा सीमापारबाट समेत देशको निर्यात व्यापार ध्वस्त पार्न उक्साहट भइरहेको दाबी गरे। त्यस्तै, श्रम मन्त्री चौधरीले अवामी फासीवादसँग जोड्न केही समूहले आगामी डिसेम्बरलाई लक्षित गरी देशमा अस्थिरता सिर्जना गर्न खोजेको आरोप लगाए।
मजदुरहरूको आन्दोलन चर्किएपछि श्रम मन्त्री आरिफुल हक चौधरीले ६ सदस्यीय नयाँ तलब बोर्ड गठन गरिएको घोषणा गर्दै मजदुरहरूलाई काममा फर्कन अपिल गरेका छन्। तर मजदुरहरूले भने जबसम्म औपचारिक रूपमा नयाँ न्यूनतम तलबको घोषणा हुँदैन, तबसम्म आन्दोलन नरोकिने अडान राखेका छन्।
यसअघि सन् २०२५ मा भएको विद्यार्थी आन्दोलनले बंगलादेशमा सत्तापलट गरेको थियो ।
