भारी वर्षाको सम्भावनालाई मध्यनजर गर्दै कैलालीको टीकापुर नगरपालिकाले असोज ९ गते नगर क्षेत्रका सम्पूर्ण सामुदायिक तथा संस्थागत विद्यालयमा सार्वजनिक बिदा दिएको छ ।
मौसम पूर्वानुमान महाशाखाले असोज ९ देखि ११ गतेसम्म देशभर वर्षाको उच्च सम्भावना रहेको जनाएको छ । अविरल वर्षाका कारण बाढी तथा डुबानको जोखिम बढ्न सक्ने भएकाले विद्यार्थी र विद्यालय समुदायको सुरक्षाका लागि बिदा दिने निर्णय गरिएको नगरपालिकाले जनाएको छ ।
नगरपालिकाको शिक्षा, युवा तथा खेलकुद शाखाले सूचना जारी गर्दै उक्त दिन विद्यालय सञ्चालन नगर्न निर्देशन दिएको छ । बिदा स्थानीय बिदाबाट समायोजन गर्नुपर्नेछ ।
