सिड्नी । पश्चिमी सिड्नीको अर्बनमा कारले ठक्कर दिँदा तीन वर्षीया बालिकाको मृत्यु भएको घटनामा २७ वर्षीय सन्दीप अधिकारीविरुद्ध मुद्दा दायर भएको छ । अधिकारीलाई लापरवाहीपूर्वक सवारी चलाएर मृत्यु निम्त्याएको आरोपमा पक्राउ गरिएको समाचार संस्था द अस्ट्रेलिया टुडेले जनाएको छ ।
उनले आरोप स्वीकार वा अस्वीकार दुवै प्रतिक्रिया बिना हालसम्म अदालतमा कुनै जवाफ दिएका छैनन् । घटनाको २४ घण्टाभन्दा कम समयपछि बुधबार अधिकारी बर्वुड स्थानीय अदालतमा उपस्थित भएका थिए ।
अदालतबाट बाहिरिने क्रममा सञ्चारकर्मीले प्रश्न गरेपछि उनीसँग केही समर्थक पनि देखिएका थिए। रिपोर्टअनुसार उनले कागजको पानाले आफ्नो अनुहार छोप्ने प्रयास गरेका थिए । अधिकारीका वकिल ड्यानी इडले घटनालाई ‘अत्यन्तै दुःखद’ भएको बताएका छन् ।
‘उनी निकै तनावमा छन् र परिवार तथा उनीहरूको अवस्थाबारे चिन्तित छन्’ इडले सञ्चारकर्मीसँग भने ।
अर्बनमा कसरी भयो घटना ?
मंगलबार दिउँसो २ बजे आसपासको समयमा अर्बनको नर्मनबी रोडमा कारले ड्राइभवेमा खेलिरहेकी बालिकालाई ठक्कर दिएको खबरपछि आपत्कालीन सेवाका टोली पुगेका थिए ।
गम्भीर अवस्थामा रहेकी बालिकालाई तत्काल वेस्टमिड अस्पताल लगिएको थियो । तर, केही घण्टापछि उनको मृत्यु भएको थियो ।
घटनामा अधिकारीलाई कुनै चोटपटक लागेको थिएन । अनिवार्य परीक्षणका लागि उनलाई अर्बन अस्पताल लगिएको थियो । त्यसपछि उनलाई अर्बन प्रहरी स्टेसन लगेर प्रहरीले मुद्दा चलाएको थियो ।
अधिकारी अहिले जमानतमा छन् । उनलाई आगामी अक्टोबर २७ मा पुनः अदालतमा उपस्थित हुन आदेश दिइएको छ । अदालतमा मुद्दा विचाराधीन रहेकाले अधिकारीमाथि लागेको आरोप पुष्टि भइसकेको छैन ।
